वोर्बोन कफीको काण्ड र मुख्य हाँगाको कोण ४५ डिग्री भन्दा कम हुन्छ । हाँगाहरु काण्ड नजिक नजिक लागेका हुन्छन्, काण्डको अन्तर आँख्लाको दुरी कम हुन्छ । यसमा धेरै सहायक हाँगाहरु निस्कन्छन् । यसको बोट करीब ३ मिटर अग्लो हुन्छ । यसका पातहरु चौडा र किनारा खुजमुजिएका हुन्छन्। फल साना हुन्छन्, बाक्लो गरी लाग्छन् र छिट्टै पाक्छ । हुरी बतास र दर्कने पानीबाट पाकेका फल झर्छन्। फल उत्पादन टिपिकाको तुलनामा २०–३० प्रतिशत बढी हुन्छ तर अरु विकसित जातको दाँजोमा कम हुन्छ । यसको फल उत्पादन नियमित छ तर फल्न ढिलो शुरु हुन्छ । फल पाकेपछि रातो फल हुने र पहेलो फल हुने गरी दुई किसिमको बोट छुट्याउन सकिन्छ । यो कफीको स्वाद उच्च गुणस्तरको हुन्छ । यो जात ९०० देखि १६०० मिटरको उचाइमा राम्रो हुन्छ ।
