भिरालो माटोमा जथाभावी खनजोत गर्दा माटोको भौतिक अवस्था कमजोर हुने, ठूलो हुरी बतास र दर्कने पानीले खुकुलो माटोलाई उडाएर एवं बगाएर लैजाने गर्छ । यसरी माटो उड्न तथा बग्न नदिन गह्रा बनाउने, घाँस एवं बिरूवा रोपी माटो संरक्षण गर्नुपर्छ । माटोको संरक्षणको निम्ति भिरालो जग्गामा समउच्च रेखा contour line पत्ता लगाई त्यसमा कफी बिरूवा लगाउने अथवा गह्रा बनाई लगाउने गर्दा माटोको बहाव रोक्न पुग्छ । जमिनको भिरालोपन १०–२० प्रतिशत (१०० मिटर जमिनको लम्बाइमा १०–२० मिटर उचाइ कम हुन) भएको जग्गामा “ए–फ्रेम” प्रयोग गरी समउच्च रेखामा गह्रा बनाई कफी बोट रोप्नु पर्छ । बढी भिरालो जग्गामा कफी बिरूवा लगाउन उपयुक्त हुँदैन ।
